Strip kartun tu dikena kitai mulaika ke pengingat ngagai ulah sekeda ari kitai mensia.Maya agi mit suba suah amai sida ke tuai ngasuh bala anembiak ngereja pengawa tu.Sida iya gali pangka garing munyi ku jaku kelaung,sepeneka ati ngasuh kitai ka agi mit."Igat,uji kalihka dek tv nya neh," ku sida ngulun kitai.Laban ka bisi ngembuan ati manchal,dia suah ninga sida ka diasuh nyaut,"bakani ka ngalihka tv nya?Ukai ulih peda sepiak nyin.Wayar bisi mih.Nama ka meda wayar pia?".Ninga saut munyinya sida ka ngasuhnya lalu lanchat tunjuk jari ngejuk ka pala."nya mih dek,ngemelik ke orang tuai,"ku iya ga nganu kitai.Kelimpah ari nya mega,maya jeman aku agi sekula 'peremeri'(primary school) ku dilah kitai Iban nyebut,kami sebilik nadai tv.Sigi enda enggau bebelika tv.Kebuah pia laban pengidup mayanya agi merinsa.Karan nadai mayanya.Bedau tama ngagai menua kami.Ai paip perintah sigi jauh di mata nya.Maya nya suba kira urung taun 90'an,sigi empai bisi pemansang menua kami.Jalai alun sigi bisi tang semina jalai tanah mirah begulai enggau tekang batu mesai dekuan.Enti ampuh bah,ayan magang batu ba jalai.Sema jaku ulih endur ngansah mata duku.Tanah luchak laban ai enda ibuh kira enda latak magang tanah.Selipar Jipun sigi putus tali kategal lekat ba tanah.
Nyadi pulai ngagai jerita pasal tv nya tadi,kami sebilik mayanya mega nadai injin api(generator).Padam mata panas di kaki langit,belabuh mih betungkunka api kelita ngena minyak gas(gasolin).Makai malam sigi tumu bala kami sebilik laban ngira pemetang malam.Pukul 6.30 belabuh nengkira ngambika tumu ga belelak berandau sebelah ruai seraya ningaka jerita Pengingat Tuai ti disadaka Thomas Tegong Laka ba radio Iban.Jenuh sekayu rumah enda ngira tikas umur,telenga lilih ninga nyawa Thomas.Udah ambis jerita Pengingat Tuai,nya baru bala anembiak(bala kami) angkat ngiga pemerindang bukai.Maya nya suba,orang ka bisi tv sigi dilawa,tama ngagai bilik sida lalu duduk tang ukai sebarang duduk.Tama aja alu dicas 0.20 sen.Sepemanjai jerita tv nya,sigi enda pansut laban enggaika dicas baru 0.20 sen enti tama ke dua kali.Ka kemi,biar ditatka mih sampai jerita ba tv ambis.Pama endar sida ka bisi tv maya nya,nemu ngecas.Enti ngira pekara nya diatu kapa aku nya!Diatu enda alah peda tv,temarung aja sebelah pak rumah.Iya jai,jai.Iya manah,manah.
Semua utai ka disebut aku ba atas nya endang gaya pengidup bedau bisi pemansang ba menua kami.Diatu,menua kami udah bisi diberi perintah karan enggau ai paip lalu nya siti ari inusr ka paling manah.Taja pan bakanya,rumah panjai kami udah angus diempa api tengan bulan Lima taun 2009 enda silap aku.Maya nya,aku nadai dia laban diau di menua Kapit bejalaika pengawa.Nyadi semua memori diau ba rumah panjai pemadu tuai udah lus diempa api,iya ke tinggal semina buah kenang aja.Nadai agi pengingat meda tv bebayar 0.20 sen.Nadai agi pengingat orang tuai ngasuh ngalihka tv ngagai sepiak.Nadai.Semina tunggul pengingat ti udah bebali nyadi tunggul.Diatu palan rumah panjai nya dikumbai temawai.Bedigir dampa kami serumah nisi tengah laman rumah panjai,sentara nganti gaga rumah panjai baru.
Pelaba aku,udah kelalu jauh buah pengingat ti dibantaika ditu.Nya mih,bepun ari strip kartun Chai Juai Labu Binjai,nyau enda berasai ga telanjur naip buah kenang diri empu.Nyangka pengingat lama nya siti ari pemanis dalam idup kitai mensia,nya kebuah kitai nyau enda berasai.Naka tu dulu mih,ila nyambung baru.

Enti kitai bekenangka pasal pengawa dikereja aku maya ke diatu,engka enda ulih dirintai panjai baka randau kemedu meraka sungai.Enda ulih diserarai baka sekaban indu utai terebai.Kekadang pala pan ngelu mikirka maioh macam leman pekara.Enti suba pengawa tu dikereja aku naka penyamai laban buah runding tauka IDEA munyi ku jaku ribai.Idea semampai bisi dalam kerubung pala.Sebut aja nama idea,jari alu bejalai ngeranjaika diri atas kertas A4 burak.Alu nyadi mih kartun sida Jabun serumah.Sekumbang aku udah datai di menua Perak (ke diatu)idea aku pan lalu punas.Lenyau terebai dipuput ribut biau balai.Engka ditabanka angin maya nepan bilun Airasia kini.Suah ga maca berita kin kitu dalam surat kabar,majalah,bup enggau meda tv,idea enggai mih datai.Buka aku lap top,main game enda lama ngicaka bisi masuk idea baru.Baka kati enggai mega datai.Nyangka daya kreativiti aku udah ambis?Enti idea enggai datai-datai,tunjuk jari ngelusu mih megai pinsil enggau pen.Nama utai ka didero deh?Rarah diri lambar buk ba pala begaru ngiga buah penemu baru.
Orang maioh amat rinduka kartun Chai Juai Labu Binjai ti baru 2 taun udah nyungkak ke diri ba column bagi Berita Iban ba Utusan Borneo.Aku mega enggau naka ulih nero kartun ba column nya ngambika bisi dikena bala pemaca surat kabar beperindang.Kekadang,kartun suah mega diulang tayang sida Utusan Borneo laban aku suah laun nganjung ngagai sida.Nya ukai salah sida.Ukai sengaja.Aku ti laun nganjung nagai sida.Aku arap semua pemaca,peminat kartun Chai Juai LAbu Binjai anang leju,serta sabar nganti kartun baru ba surat kabar Utusan Borneo.Nadai jaku bukai agi aku tu asai iya,semina ngarapka semua peminat Jabun @ Chai Juai Labu Binjai ulih nyukung tauka terus nyukung pemansang kartun aku tu.Terima kasih.

Entara Patriotik Enggau Politik

Semangat patriotik enda sebaka enggau semanata politik.Anang kitai saru ninga munyi 'tik,tik' aja ba ujung mulut enggau dilah.

Chai Juai Labu Binjai ( Versi Lawak Gila)

Tabi Basa ngagai semua kita ke bisi tepejuh ngelawa blog aku tu.Minta ampun laban lama udah enda 'update'blog laban sibuk enggau maioh leman pengawa.Serak tu,aku mai kita beratika sekeda ari asil keranjai jari aku.Semua orang udah nemu populariti kartun Chai Juai Labu Binjai ba column Berita Iban,Utusan Borneo.Bisi di entara peminat setia kartun Chai Juai Labu Binjai mungkal nanya aku,kemaya bisi koleksi Chai Juai Labu Binjai.Ngambika semua kitai nemu,koleksi Chai Juai labu Binjai Vol bagi Satu udah mujur dijual maya Hari Sejiwa Senada di Kapit.Penyampau 30 iti bup nya ambis dijual enggau rega RM25.00.Kira edisi terhad mih nya.Udah Koleksi Chai Juai labu Binjai mujur dijual,enda lama udahnya bisi mega peminta ari bala peminat ngasuh nyelak koleksi Chai Juai Labu Binjai Vol bagi ke Dua.Bah,kemaya nya kini?Enggau peluang tu aku deka mantaika asai terima kasih ngagai semua bala peminat kartun Chai Juai Labu Binjai.Koleksi vol 2 empai temu kemaya deka dicelak.Ila madah baru au.Enggau tu aku mantaika sekeda ari kartun ti pemadu baru ari aku.