Strip kartun tu dikena kitai mulaika ke pengingat ngagai ulah sekeda ari kitai mensia.Maya agi mit suba suah amai sida ke tuai ngasuh bala anembiak ngereja pengawa tu.Sida iya gali pangka garing munyi ku jaku kelaung,sepeneka ati ngasuh kitai ka agi mit."Igat,uji kalihka dek tv nya neh," ku sida ngulun kitai.Laban ka bisi ngembuan ati manchal,dia suah ninga sida ka diasuh nyaut,"bakani ka ngalihka tv nya?Ukai ulih peda sepiak nyin.Wayar bisi mih.Nama ka meda wayar pia?".Ninga saut munyinya sida ka ngasuhnya lalu lanchat tunjuk jari ngejuk ka pala."nya mih dek,ngemelik ke orang tuai,"ku iya ga nganu kitai.Kelimpah ari nya mega,maya jeman aku agi sekula 'peremeri'(primary school) ku dilah kitai Iban nyebut,kami sebilik nadai tv.Sigi enda enggau bebelika tv.Kebuah pia laban pengidup mayanya agi merinsa.Karan nadai mayanya.Bedau tama ngagai menua kami.Ai paip perintah sigi jauh di mata nya.Maya nya suba kira urung taun 90'an,sigi empai bisi pemansang menua kami.Jalai alun sigi bisi tang semina jalai tanah mirah begulai enggau tekang batu mesai dekuan.Enti ampuh bah,ayan magang batu ba jalai.Sema jaku ulih endur ngansah mata duku.Tanah luchak laban ai enda ibuh kira enda latak magang tanah.Selipar Jipun sigi putus tali kategal lekat ba tanah.
Nyadi pulai ngagai jerita pasal tv nya tadi,kami sebilik mayanya mega nadai injin api(generator).Padam mata panas di kaki langit,belabuh mih betungkunka api kelita ngena minyak gas(gasolin).Makai malam sigi tumu bala kami sebilik laban ngira pemetang malam.Pukul 6.30 belabuh nengkira ngambika tumu ga belelak berandau sebelah ruai seraya ningaka jerita Pengingat Tuai ti disadaka Thomas Tegong Laka ba radio Iban.Jenuh sekayu rumah enda ngira tikas umur,telenga lilih ninga nyawa Thomas.Udah ambis jerita Pengingat Tuai,nya baru bala anembiak(bala kami) angkat ngiga pemerindang bukai.Maya nya suba,orang ka bisi tv sigi dilawa,tama ngagai bilik sida lalu duduk tang ukai sebarang duduk.Tama aja alu dicas 0.20 sen.Sepemanjai jerita tv nya,sigi enda pansut laban enggaika dicas baru 0.20 sen enti tama ke dua kali.Ka kemi,biar ditatka mih sampai jerita ba tv ambis.Pama endar sida ka bisi tv maya nya,nemu ngecas.Enti ngira pekara nya diatu kapa aku nya!Diatu enda alah peda tv,temarung aja sebelah pak rumah.Iya jai,jai.Iya manah,manah.
Semua utai ka disebut aku ba atas nya endang gaya pengidup bedau bisi pemansang ba menua kami.Diatu,menua kami udah bisi diberi perintah karan enggau ai paip lalu nya siti ari inusr ka paling manah.Taja pan bakanya,rumah panjai kami udah angus diempa api tengan bulan Lima taun 2009 enda silap aku.Maya nya,aku nadai dia laban diau di menua Kapit bejalaika pengawa.Nyadi semua memori diau ba rumah panjai pemadu tuai udah lus diempa api,iya ke tinggal semina buah kenang aja.Nadai agi pengingat meda tv bebayar 0.20 sen.Nadai agi pengingat orang tuai ngasuh ngalihka tv ngagai sepiak.Nadai.Semina tunggul pengingat ti udah bebali nyadi tunggul.Diatu palan rumah panjai nya dikumbai temawai.Bedigir dampa kami serumah nisi tengah laman rumah panjai,sentara nganti gaga rumah panjai baru.
Pelaba aku,udah kelalu jauh buah pengingat ti dibantaika ditu.Nya mih,bepun ari strip kartun Chai Juai Labu Binjai,nyau enda berasai ga telanjur naip buah kenang diri empu.Nyangka pengingat lama nya siti ari pemanis dalam idup kitai mensia,nya kebuah kitai nyau enda berasai.Naka tu dulu mih,ila nyambung baru.

Runding Bansa Kitai

Tabi basa ngagai semua,
Lama amai asai udah enda update blog aku tu.Asaika 1 bulan udah nandan langit,setahun nampun dibukit empa pengelama enda diupdate(engka kini,pelaba ka aja).Kebendar iya,aku bisi pekara ti deka dipejuraika dalam post tu.Serak tu aku kita bekenang ulah sekeda ari bala kitai bansa iban ti enda nemu menghargai hasil teritik peluh orang bukai.Lebuh aku beforum ba website Ruai Kitai empai lama ti udah,dia aku bisi posting siti kartun aku ti udah publish ba surat kabar Utusan Borneo(enda ibuh padah mih nama kartun nya).Ari pemayuh komen bala raban RK,bisi enselit siku mensia ti dipelabaka aku endang urang ti enda kala nyukung bansa diri empu,nepu komen ngena jaku ribai.Leka jaku iya enda aku ingat laban maya nya ati aku udah panas.Darah gegesak niki pala uchung maca posting reply akihnya.Lebih kurang munyi tu mih genteran jaku iya "Kartun ka didero ba surat kabar di menua kitai tu nadai ngundan unsur humor enggau lucu,tang iya semina tau dikumbai substandard humor aja.Kasih amai aku meda bala kartunis kitai bansa".Ati sapa enda ringat enti dikemaruhka bansa diri empu bakanya.Bah,aku enda cechamang lalu nganjung ngagai iya private message(pm) munyi tu "enti asai ngumbai kami kartunis Iban semina ngundan substandard humor ba kartun kami,ni pengawa dik ke kala nulong bansa diri empu deh?Anang nemu mengkritik aja tang enda nemu ngereja pengawa.Uji dik nero kartun, aku mengkritik iya.Naka ni pengelandik diri ulih dipantaika dik?!Anang bejakuka orang enti diri empu empai meda chermin,"

Kira munyi nya mih jaku ti dibalas aku ngagai iya.Udahnya aku lalu befacebook deka muai ati gidan.Nasit ga tetemuka JC.Aku lalu ngeripot ngagai iya pasal pekara ti udah nyadi tadi.Iya pan madamka posting akunya enggau pemendar ari aku empu.Kelalu sensitif serta angat ku iya.Aku pan berasai lantang mega.Enggaika aku makin panas..:D

Ngagai semua pemaca blog aku tu,aku arap kitai sama meretika pekara ti dibantaika aku tu dikena kitai neladan diri empu.Enti kitai deka mengkritik siti-siti pekara ti bekaul enggau pengawa ti dikereja orang bukai,kitai mesti bepikir dulu.Berundingka nama utai ti tau dipansutka itai.Kritik bisi seni kediri empu tang ukai enggau cara provokasi tauka menghentam,ngelantak sebarang aja.Indah baka urang buta deriba entuka.Asai aku,cukup mih naka tu dulu randau kitai.Ila aku nampung baru ga.Anang tinggal ngabas blog aku au.Aku tu deka negika bansa ngena jalai kartun.Semina kartun aja ulih alai aku mantaika pekara ti bekaul enggau kitai Iban.Sebedau aku ngelengka kita ditu aku bisi posting kartun dikena merindang semua bala kitai dayak.Ambika mesej dalam kartun nyadika teladan kitai nempuh dunya penguji atur petara.Bah,mupok aku.