Kartun Ba Majalah Sempandai Edisi Keterubah

Chai Juai Labu Binjai Three Panel Cartoons

Pelaba aku,baru iya mih aku ngaga kartun 3 panel dalam siti lambar.Naka ka diatu,semua kartun aku semina dalam dua iti kotak(panel) aja.Ka nguji nukar angin munyi ku jaku kitai.Diatu aku nguji mupuk belubah nero kartun dalam 3 panel lalu deka 'upgrade'panel kartun ngagai 3 tauka 5 panel.Nambah ka nya mega,aku bisi nguji ngiga idea tauka buah runding ti manah serta engkeman dikena nyadi pekara ti patut dibantaika dalam tiap strip kartun.Nyadi semua kartun aku endang engkeman dibacha semua orang enda ngira tikas umur.Kelimpah ari tu,Page Chai Juai Labu Binjai ba Facebook mega bisi betambah ninting hari.Naka blog tu ditulis,Chai Juai Labu Binjai udah bulih 814 'LIKE'.Ngagai semua orang tauka peminat ti bisi 'like' page Chai Juai Labu Binjai,aku enggau besai ati meri besai terima kasih ngagai semua kita enda ngira dini-dini alai diau.Aku enggau naka ulih merindang semua kita ngena asil keranjai jari aku tu.Ngagai sapa-sapa ka bisi tepejuh ngelawa blog aku tu,aku meri tabi basa Selamat Datai lalu kair-kair dia mih sebarang pekara ti ulih merindang ati kita.Mupok dulu aku wai.

Enti kitai bekenangka pasal pengawa dikereja aku maya ke diatu,engka enda ulih dirintai panjai baka randau kemedu meraka sungai.Enda ulih diserarai baka sekaban indu utai terebai.Kekadang pala pan ngelu mikirka maioh macam leman pekara.Enti suba pengawa tu dikereja aku naka penyamai laban buah runding tauka IDEA munyi ku jaku ribai.Idea semampai bisi dalam kerubung pala.Sebut aja nama idea,jari alu bejalai ngeranjaika diri atas kertas A4 burak.Alu nyadi mih kartun sida Jabun serumah.Sekumbang aku udah datai di menua Perak (ke diatu)idea aku pan lalu punas.Lenyau terebai dipuput ribut biau balai.Engka ditabanka angin maya nepan bilun Airasia kini.Suah ga maca berita kin kitu dalam surat kabar,majalah,bup enggau meda tv,idea enggai mih datai.Buka aku lap top,main game enda lama ngicaka bisi masuk idea baru.Baka kati enggai mega datai.Nyangka daya kreativiti aku udah ambis?Enti idea enggai datai-datai,tunjuk jari ngelusu mih megai pinsil enggau pen.Nama utai ka didero deh?Rarah diri lambar buk ba pala begaru ngiga buah penemu baru.
Orang maioh amat rinduka kartun Chai Juai Labu Binjai ti baru 2 taun udah nyungkak ke diri ba column bagi Berita Iban ba Utusan Borneo.Aku mega enggau naka ulih nero kartun ba column nya ngambika bisi dikena bala pemaca surat kabar beperindang.Kekadang,kartun suah mega diulang tayang sida Utusan Borneo laban aku suah laun nganjung ngagai sida.Nya ukai salah sida.Ukai sengaja.Aku ti laun nganjung nagai sida.Aku arap semua pemaca,peminat kartun Chai Juai LAbu Binjai anang leju,serta sabar nganti kartun baru ba surat kabar Utusan Borneo.Nadai jaku bukai agi aku tu asai iya,semina ngarapka semua peminat Jabun @ Chai Juai Labu Binjai ulih nyukung tauka terus nyukung pemansang kartun aku tu.Terima kasih.

Chai Juai Labu Binjai ( Versi Lawak Gila)

Tabi Basa ngagai semua kita ke bisi tepejuh ngelawa blog aku tu.Minta ampun laban lama udah enda 'update'blog laban sibuk enggau maioh leman pengawa.Serak tu,aku mai kita beratika sekeda ari asil keranjai jari aku.Semua orang udah nemu populariti kartun Chai Juai Labu Binjai ba column Berita Iban,Utusan Borneo.Bisi di entara peminat setia kartun Chai Juai Labu Binjai mungkal nanya aku,kemaya bisi koleksi Chai Juai Labu Binjai.Ngambika semua kitai nemu,koleksi Chai Juai labu Binjai Vol bagi Satu udah mujur dijual maya Hari Sejiwa Senada di Kapit.Penyampau 30 iti bup nya ambis dijual enggau rega RM25.00.Kira edisi terhad mih nya.Udah Koleksi Chai Juai labu Binjai mujur dijual,enda lama udahnya bisi mega peminta ari bala peminat ngasuh nyelak koleksi Chai Juai Labu Binjai Vol bagi ke Dua.Bah,kemaya nya kini?Enggau peluang tu aku deka mantaika asai terima kasih ngagai semua bala peminat kartun Chai Juai Labu Binjai.Koleksi vol 2 empai temu kemaya deka dicelak.Ila madah baru au.Enggau tu aku mantaika sekeda ari kartun ti pemadu baru ari aku.